Нашая супольнасць працуе ў наступных напрамках:


Прадстаўленне інтарэсаў беларусаў у Кракаве

Гэты напрамак складаецца з арганізацыі акцый, маршаў, пікетаў, наладжання сувязяў з адміністрацыяй горада ды іншымі дзяржаўнымі ўстановамі, супрацы з польскімі СМІ, выступаў на анлайн-мерапрыемствах і розных канферэнцыях.


Дапамога беларускім бежанцам

Мы актыўна займаемся дапамогай беларускім бежанцам у Кракаве і Польшчы: ездзім у лагеры для бежанцаў, дапамагаем з пошукам і часам з аплатай жылля, купляем прадукты, вырашаем пытанні з дакументамі, падачай на міжнародную ахову альбо ўладкаваннем дзяцей у школу, а таксама пошукам працы. Таксама мы арганізавалі бясплатны курс польскай мовы, каб бежанцы хутчэй маглі адаптавацца ў Польшчы і ўладкавацца на працу. Мы аказваем інфармацыйную дапамогу. Арганізаваны збор сродкаў і дабрачынны аукцыён, дзе можна купіць нейкую рэч і такім чынам дапамагчы.


Беларуская культура

Наша супольнасць займаецца арганізацыяй розных мерапрыемстваў: ад музычных вечароў, беларускіх пікнікоў да экскурсій па беларускім Кракаве і выстаў пра беларускае мастацтва. Мы хочам пазнаёміць людзей з беларускай культурай і адкрытыя да сумесных праэктаў.


Супраца з іншымі дыяспарамі Польшчы і свету

Мы ўдзельнічаем у стварэнні сеціва супрацы з іншымі дыяспарамі Польшчы і свету. Гэта дазваляе нам вырашаць сотні сітуацый, перанакіроўваць і размяркоўваць абавязкі паміж дыяспарамі. Мы працягваем працаваць над сістэматычным рашэннем адносна дапамогі бежанцам, дапамогі ў лагерах і асобна.

У асноўным, нашая каманда складаецца з беларусаў, але мы вельмі адкрытыя да супрацы з рознымі этнічнымі групамі. Палякі, украінцы, расіяне, армяне і ўсе-ўсе-ўсе: калі ў вас ёсць ідэі альбо жаданне дзейнічаць, пішыце да нас, мы вельмі ўсцешымся!

З траўня 2021 года мы маем афіцыйны юрыдычны статус і з'яўляемся Фондам імя Эмерыка Хутэн-Чапскага. Дзякуючы нашаму статусу, мы можам афіцыйна прадстаўляць інтарэсы беларусаў у гарадскіх агранах кіравання і сярод іншых недзяржаўных агранізацый.

У нашай камандзе няма кіраўнікоў і падпарадкаваных – кожны можа прапанаваць і ажыццявіць свой праект. Мы падзяляемся на ініцыятыўныя групы згодна з цікаўнасцямі і разам працуем над рэалізацыяй. Усе глабальныя рашэнні прымаюцца выключна на дэмакратычнай аснове ўдзельнікамі супольнасці.

Супольнасць Беларусаў у Кракаве адкрытая для новых людзей ды ідэй. У вас ёсць задума для мерапрыемства ці акцыі? Мы можам дапамагчы яе зарэгістраваць, знайсці апаратуру альбо памяшканне. Вам патрэбная моўная дапамога? Мы знойдзем валанцёраў, якія дапамогуць вам звярнуцца да адміністрацыі горада і вырашыць пытанні. Вы нядаўна пераехалі ў Кракаў і нікога не ведаеце? Пішыце нам, будзем знаёміцца і арганізоўваць сустрэчы. Вам давялося пакінуць Беларусь па палітычных прычынах? Мы можам дапамагчы з прадуктамі, пошукам жылля альбо медыцынскiм абслугоўваннем.

Любы ваш удзел у жыцці супольнасці значны. Гэта можа быць наведванне нашых мерапрыемстваў, інфармаванне пра дзейнасць Беларусаў у Кракаве ў сваіх сацыяльных сетках, дапамога беларускім бежанцам. Таксама вы можаце стаць актыўным удзельнікам нашай каманды. Вы хочаце быць фатографам, капірайтарам, арганізатарам мерапрыемстваў, смм-шчыкам, апекуном беларусаў, якім патрэбна дапамога? Можа быць, у вас ёсць прынтар і вы маглі б дапамагаць з друкам улётак? Калі вы пакуль што не ведаеце, чым хацелі б займацца, гэта не праблема! Мы разам прыдумаем ролю для вас. Кожны рэсурс важны і каштоўны, і нам праўда патрэбная вашая дапамога.